Agar aapne is saal Class 12th pass kiya hai aur Bihar ke sabse prestigeous institute Patna University (PU) se apna Graduation karna chahte hain, toh aapke liye good news hai. Patna University ne Four-Year Undergraduate Programme (FYUGP) ke tahat BA, BSc, BCom aur alag-alag Vocational courses (Session 2026-2030) ke liye online application shuru kar diye hain.
Patna Science College, B.N. College, Magadh Mahila College, aur Patna College jaise top institutes mein har saal hazaro students apply karte hain. Seats limited hain aur thodi si galti aapka admission cancel karwa sakti hai.
Patna University Admission 2026: Kuch Important Dates
Form bharne se pehle aapko timeline ka andaza hona zaroori hai taaki aap last date ka intezar na karein:
- Online Application Start: May 2026 ke pehle hafte se forms live ho chuke hain.
- Online Apply Last Date: Application form bharne ki aakhri tithi June 2026 ke dusre se teesre hafte tak rakhi gayi hai.
- Admission Base: Is saal bhi bacho ka admission Class 12th ke Marks (Merit Base) par hone ki poori chance hai. Agar University Entrance Test legi, toh uski details bhi portal par update ho jayegi.
Eligibility Criteria Kya Hai?
- Aapka kisi recognized board (BSEB, CBSE, ICSE) se 12th pass hona compulsory hai.
- Jis subject ko aap Major Paper (Honours) banana chahte hain, usme kam se kam 45% marks hone chahiye.
Form Bharne Se Pehle Ye Documents Ready Rakhein
Online apply karne baithne se pehle in documents ka clear scan copy (JPEG format, under 100KB) apne phone ya laptop mein save kar lein:
- Class 10th aur 12th ki Marksheet
- Passport size Photograph aur Signature
- Caste Certificate (Agar aap OBC, EBC, SC, ya ST category ka labh lena chahte hain)
- Income Certificate (EWS category ke liye)
- Aadhaar Card Number
Step-by-Step Online Apply Process
Patna University ka admission process unke official student portal se hota hai. Chaliye poore tarike ko steps mein samajhte hain:
1.Official Website Par Jayein:
Sabse pehle Patna University ki official website pup.ac.in par jayein. Homepage par aapko “UG Admission 2026-30 Apply Online” ka ek link dikhega, us par click karein.
2.New User Registration (Sign Up):
Naya account banane ke liye ‘New User Registration’ par click karein. Apna Name, Mobile Number, Email ID, aur Class 12th ka roll number daal kar submit karein. Aapke number par ek OTP aayega use verify karte hi aapko ek User ID aur Password mil jayega.
3.Personal & Academic Details Fill Kare:
Ab apne User ID aur Password se login karein. Sabse pehle apni personal details (Mata-Pita ka naam, Category, Blood Group) bharein. Uske baad ‘Academic Details’ tab mein ja kar apne 10th aur 12th ke board ka naam, roll number aur subject-wise marks dhyan se fill karein.
4.College Aur Course Preference Chunein:
Yahan aapko apni choice ke colleges aur streams select karne honge. Jaise agar aapko BSc karna hai, toh aap Patna Science College ya B.N. College ko priority set kar sakte hain. Aap ek se zyada college aur course combinations chun sakte hain.
5.Documents Upload Aur Payment Karein:
Apna photo, signature aur category certificate upload karein. Sabhi details ko ek baar preview karke re-check kar lein. Sab sahi hone par application fee (lagbhag ₹1100 regular courses ke liye) Net Banking, Credit Card ya UPI ke zariye online pay kar dein.
Application Fee Payment Ke Baad Kya Karein?
Form final submit hone ke baad uska ek printout nikal kar aur payment receipt ko apne paas rakh lein. Jab Patna University apni First Merit List jari karegi, tab agar aapka naam usme aata hai, toh aapko wahi printout lekar allotted college mein physical document verification aur final admission ke liye jana hoga.
FAQs: Aksar Puche Jane Wale Sawal
1. Patna University UG Admission 2026 ke liye official portal link kya hai?
Iska official online portal link pup.ac.in hai. Iske alawa aap direct admission portal link patnauniversity.org.in par bhi ja sakte hain.
2. Kya ek hi form se regular aur vocational dono courses ke liye apply kar sakte hain?
Nahi, regular (BA, BSc, BCom) aur vocational (BCA, BBA, BMC) ke liye portal par alag-alag links diye hote hain. Agar aap dono mein try karna chahte hain, toh dono ke liye alag se preference select karke fee deni hogi.
3. Kya Bihar se baahar ke students (jaise Jharkhand ya UP) apply kar sakte hain?
Haan, Patna University mein pure desh ke students apply kar sakte hain. Halanki, jo reservation categories (OBC/EBC/SC/ST) ka labh hai, wo sirf Bihar ke local residents ko hi milta hai. Baahar ke students General category mein aayenge.
4. Agar form mein koi galti ho jaye toh correction kaise hoga?
Application window band hone ke baad university 2 se 3 dino ke liye Correction Window open karti hai. Us dauran aap login karke apni details sudhaar sakte hain.
5. Patna University mein graduation kitne saal ka hai?
New Education Policy (NEP) ke tahat ab graduation poore 4 saal (FYUGP) ka ho gaya hai, jisme aapko research degree ke saath certificate/diploma ke exit options bhi milte hain.